الوطن /// للشاعر أثير التميمي

الوطن ...

يا وطن لو نبدي بسم الله
لو بسم الجروح الرافگن جسمك
..
لو بسم الاخوة وغيرة العباس
لو نختم تلاوة ايتك بسمك
..
بسمك يا وطن نرفع شعار الثار
وعار يلوح گصته الماخده بدمك
..
بسمك حرفو رادوك بلكي تضيع
وانت الصححت ماضيهم بقلمك
..
باگو كل سعفنه وكسرو التنور
يا گرصت خبز كل ضنهم نثلمك
..
جي گرصت خبز ظلينه نحلف بيك
جعنه بهمنه اكلنه وبيك اكل همك
..
يا لگمة جياع وهدمة العريان
مو انت التجوع وينفتك هدمك
..
ولاعلمك تنخه بساريات العوز
على رگبنه وغلاتك يرفع علمك
..
باجر ينكشف وجه الحرامي الباگ
والغض النظر والحاول يهدمك
..
باجر ينكشف كل خافي والمستور
باجر مو بعيد وداعتك يمك
..
طر خيط الفجر واحنه بوداع الليل
فقط ساعات ظلن ينهزم خصمك
..
لأطراف الصحار نطرد الرعيان
ونخلي الحقيقة التلتزم حلمك
..
ونوافق نعم في فكرة التقسيم
نتقسم جثث مو نقبل نقسمك
..
ماعاش اليمسك يا شرف حرات
بل يخسه اليحاول يخدش برسمك
..
ربك مو خلق لابن ادم ذراعين
ربك في علم هالمسألة تهمك
..
خله الشيعه لك والسنه يعني ثنين
خافنك تطيح ثنينه نلمك
..
ثق شعبك جمع كلهم عمر مختار
لأجلك ننعدم بس محد يعدمك