التلطيش بس من نوع اخر عنا بسوريا

مرحبا كيفكم حبيباتي اليوم جايبلكم مو ضوع عن التلطيش بس عنا بسوريا الو نكهه خاصه وطابع خاص وللتلطيش انواع اولها التلطيش بالسياره طبعا بيكون بتسميع بعض الاغاني للجنس اللطيف مثلا < ازمه عاطفيه >هاني شاكر مطرب العلاقات العاطفيه غلطه
عشق وغرام وحب وهيام تامر حسني الله يباركلي فيكي
اما اذا القصه فرفشه وتلطيش بالجمله ما الهم غير فارس كرم ختيار العلعكازه
وفي عندك جماعة العين بصيره والايد قصيره وهني الاغلبيه اللي كاسحين السوق كسح هدول بيمشو وبيوقفو وهني عم يغمزو ويلطشو ومن اهم اقوالهم المأثوره
على رمشي السافو بيمشي
ولي على بعضي اول مره بشوف قمر ماشي عالارض
اي والله من حقك ترفسي القمر وتقعدي محلو وتلفي رجل على رجل

وفي شباب التلطيش عندهم هوايه لا اكتر ولا اقل وهدول ما بيقصدو اماكن تجمع الصبايا ومابيفكرو يلحقو بأي بنت اساسا بس اذا صادفتهم وحده بيقومو بالواجب على اكمل وجه مثلا واحد واقف على باب محلو ومرقت بنت من قدامو لابسه ومترتبه وبحرف عينو بيطلع بجارو ومابيقصر وبيقلو لجارو شو جار رخصان اللحم ولا غليان القماش واذا مرت من قدامو بنت محجبه وبكل ادب بيقلها عازمك عالحج واذا فقست منروح عالمسبح اما اذا كانت لابسه برمودا بيقلها اي تقبريني شو جايي تشطفي المدخل واذا مرو من قدامو مجموعه من الامورات كمان ما بيقصر وبيقول الله لا يفرق بيناتكم تتجوزوني انتو الاربعه اي والله الشرع ما بيحكي شي مو هيك اخي ابو ياسرؤ هاد طبعا جارو
وفي عنا مجموعه من الشباب يلي بيخترعو جمل وعبارات للتلطيش وعباراتهم ما فيها غزل ابدا بيخترعوها من باب الغلاظه والتقريق وليضحكو رفقاتهم وينالو لقب يئبرني شو مهضوم مثلا واحد بيقول لبنت شو رأيك تتجوزيني عندي بسكليت يعني دراجه هوائيه بكتبلك الدواسات مقدم والدواليب مأخر
والتاني اذا شاف بنت ماشيه ومستعجله بيقلها وينك ما عرفتيني انا فارس ؟؟؟؟؟؟؟؟ فارس احلامك واذا شي وحده ماشيه ومعها ولد صغير بيقلها هاتي الولد احسن ما اخدو منك بالمحاكم
وفي تلطيش بيسمو البنات تلطيش تعجيزي مثلا بيكون ماشيه بنتين شو بيقول احلى شي فيكم يلي بالنص او تالت وحده عالشمال وبيتركهم صفنانين وعم يفكرو
وفي ما يلي نرد اليكم بعض المصطلحات في التلطيش عنا بس بسوريا
شلخة وتعني جميله جدا
شقفة وتعني جميله ولكنها اقل درجه من الشلخه
تحشي تحشي وتعني انتبه فربما كان قادم ابوها او اخوها
باربي وتعني الجمال المرتبط بالرشاقه
وازنه وتعني فتاة راقية جدا
بنت خاروف وتعني انها ثرية وقابلة للاستغلال المادي
خورفها وتعني اي استغلها ومشي الحال
ولكل اللي لطش ويلي عم بيلطش منقول حاج بقى ستحو على دمكم شو ماضل في ناموس بالبلد
بتمنى كون قدمت اليوم شي مميز عن شباااااااااااااااااااااب سوريا طبعا مو الكل لا بس يلي عم يلطشو
مع تحيــــــــــــــــــــــــــــ برنسيس سوريا ــــــــــــــــــــــــــــــــــــــــــــات