أخو عثمان ///للشاعر صباح الهلالي

أخواني اعضاء المنتدى الكرام
السلام عليكم ورحمة الله وبركاته
هذه قصيدة أحو عثمان
للشاعر المتألق صباح الهلالي والتي حاز على أثرها
المركز الاول
وهي من اجمل القصائد التي قرأتها
والتي تنبذ الطائفية المقيته التي حلت على بلدنا الحبيب
وانتم معي تعالوا نستمتع بما اجادت بها أنامل شاعرنا المتألق


أخو عثمان
للشاعر صباح الهلالي

بعد ماي الفرات لضيفنا نبدي والكطان الازرك مانكر شصه
وكل أسباب جوعي بدون استثناء كلهه تروح فدوه لورقة الحصة
كبل خطار أجاني وصادفت عوز على خدودي شمع ذابت الكصه
ولأن تنوري طين وغيرته من الكاع خلص عدنا العجين استنسخ الكرصه
هسه شبينا ليش وشختلف بالناس إذا يلتفت ضيفك ينوكل نصه
أهلنا البيت واحد شو صفو ضدين مله تلوم مله وبالكلب غصه
اركض طاح أخوك بضهره حط سجين لاغيرك يذبحه تفوتك الفرصة
سكرانه العدالة وناس تاكل ناس زمن صارن خوات العلوه والنصه
ضم هور الجبايش والفكر بستان وبكلب الرمادي خنجرك رصه
وإلك مو عيب وإحنا اللي نشيل الراس شلون جفوفنا تكض راسنا تكصه
اختلفنا أحنا بعلي وبعمر وبعثمان لو يدري محمد بينا ماوصه
المحتل أطلعه حط أيديك وياي يامحتل طلع بالهوسة والخبصة
كطرة حيانا والتكصه
يعرفنا اللي نشد عنا والتكصه
ولك أحنا بجسد واحد والتكصه
جفك لاتظن كصيت أيديه
فدوه أرجوك تهده وتلعن الشيطان عسى من غيراك أبخته وبحظه
آني شردت منك غير ننسى الراح وطرفك عل الزعل بيناتنا تغظه
انفطمنا ع البنادق وأنت تعرف زين الشعيرة بلا نفع لو زعلت ألفرضه
آني وياك سيف ونذبح الجلاد وإذا تعجز أيدينا بلوزته نعظه
العباس جدنا ألما أحتاج اجفوف ظل حد السنون ولازم القبضة
جا شنهو وعليمن ليش مختلفين أنه شنهو القبلته وأنت الترفضه
يجوز ألما أكضه الخلل بالجفين اليعبر عليه جفوفك تكضه
انه غركان يمك آه يا اخو عثمان اللي بجسر الأئمة ماصفن لحظة
شاف الأيد وحده ولازمت هل الماي وعلى دم الجفوف الصاحت تشظه
أنا دجلة الخير المانست عطشان واخوي أنت الفرات وترضه ماترضه
اختلفنا بأولياء الله وضعنا
وإحنا الساس للدنيا وضعنا
وربك مانغير من وضعنا
شرط اله تحط أيدك بأيديه