محمدابوجعفر صاحب المنتدى
الجنس : عدد المساهمات : 171 نقاط : 407 تاريخ التسجيل : 18/06/2010 العمر : 55
| موضوع: كهرباء ... للرجال فقط الجمعة 25 مارس - 22:51 | |
| كهرباء ... للرجال فقط حبيب العربنجي يابة وحق الكائنات والبكتيريا والطفيليات ترى آني لگيت الحل لمشكلة الكهرباء بالعراق.... وهذا الحل موجود في كل محافظة عراقية مؤمنة بالديمقراطية وناسها جاي يمشون وي المسيرة السياسية حبابين و يهوسون بحياة قائد المسيرة الظافرة. بكل محافظة عراقية تنعم بالبؤس الديمقراطي – إي ولو تئبرني حتى البؤس نعمة بالعراق المفدرل الحصصي – أكو الحل الكامل والسلاح الشامل لتدمير مشكلة الكهرباء من الأمبير والفولت والواط والفاراداي.. حل ما حد منتبه له لأن إحنا كلنا مشغولين بشوفة جمال الديمقراطية في ربوع وطننا الحبيب إللي صدگ راح يصير ربوع وأنصاص وثمن من ورا كل واحد عنده چم راس بالعشيرة و يطلب يصير أقليم لو ولاية بطيخ.. والحل جاي نشوفه على قنواتنا الفضائية المحايدة جدا جدا...إللي تبشرنا صارلها أسبوعين بعدم وجود أي بسطال أو جندي أمريكي بالعراق، بشرفي إحنا تحررنا بس لأن الامريكان هلگد خوش أوادم حتى من طلعوا ما حسينا بيهم...سمعوا مذيعة قناة العراقية.. گالت الشعب البحريني دا يعاني من وجود قوات أجنبية على أرضه ...ولچ صخام صخمچ ...ليش ما گلتينا حتى لو بمسج على قناة أغانينا " يابة ترى نبشركم ماكو أي جندي أجنبي بالعراق "....شنو الأمريكان نطيناهم جنسية عراقية وحصة تموينية وإحنا ما ندري؟؟ لو شنو الموضوع يمعودة فهمينا الله يفتح عليچ أبواب الحوزة وبركات شيوخها...ترى إحنا بالإحتلال والتحرير گوجة مرحبا طلعنا كل شي ما نفتهم... يمعودة إحنا ثول وزمايل دا أكوللچ عدنا حل للكهرباء يمنا بكل مدينة ومدا نحس بيه..تريدينا هسة نحس إحنا متحررين لو محتلين... ترى إنتي صدگ بطرانة ودا تشوفين الدنيا من شيشة دبس حلوة كلش. نرجع لسالفتنا إللي طلعنا منها إلى طريق ترابي...إي..حل مال الكهرباء...الحل موجود على قنواتنا الإخبارية العاملة والراقصة والمحجبة..ماكو فرق... تعالوا سمعوا أي واحد يريد يحچي قصته بالسجن – العفو العفو العفو – أقصد من چان ضيف عد أهل الكرم والجود.. نسمع طرق عجيبة بالترحيب بالضيف...وباحدى هاي الطرق تكمن العبقرية العراقية وحل الكهرباء... سمعوا زين لأي واحد يحچي بالكرم والجود في مضايف أبو الجود..راح نسمع أكو (كهرباء) بالمكان إللي هم چانوا موجودين...ضيوفا أو سجناء هذا مو موضوعنا...موضوعنا هو أكو كهروباء...وأكو بكثرة إلى درجة حايرين شي يسوين ووين يصرفون الفولتية والامبير... مرة يخلوها على الراس المبلل ومرة ن بين الرجلين وتحت البيضتين لتنشيطها مو عبالكم لغير شي صدگ ما تستحون يعني الحكومة الجبارة الرشيدة دا تنشط بيضاتكم بالـ(كهرباء) العزيزة والغالية وأنتو جايين تحچون عليها..بدال ما تبوسون إيد الحكومة (ديروا بالكم لا تبلعون الخرزة بالخاتم) دا تكفرون بهاي النعمة الغالية...صدگ البطران يظل بطران حتى الله يسلط عليه آل برزان وطالبان والضرطان... حييييييييييل بيكم. ووصلنا إلى فكرة الحل ...مثل ما تشوفون وتسمعون الحكومة الرشيدة الجبارة القادرة عدها كهرباء بالمضايف مالتها (إللي يسميها الناس الجهلاء بالسجون السرية ...صدگ ما شايفين وشافوا)..واصلاً الحكومة جاية توزعها ببلاش بدال الفياجرا لتنشيط البيضات .. والحل هو لازم كلنا نصير ضيوف ونعزم نسفنا (لأن الحكومة ما تسوي وتعزمنا لأن هي يا دوب إللي عدها يكفيها چم لگمة )... والشغلة ما يراد لها غير هوسة وصفگتين وتروح بالزلگ... أقصد تشرف عد الحكومة بس لا تنسون قبل ما تروحون رتبوا بيضاتكم لإستلام الحصة الكهربائية الكاملة. والحل الثاني (أي مو هاي المشكلة تنحل بطريقتين ومدومن عالراسين) هو تسليم المحافظات العراقية كلها إلى إدارة السجون السرية - يابة العفو أقصد المضايف الحكومية – حتى هم يديروها ومن وين يجيبون الكهرباء ما علينا المهم عدنا كهرباء ...يجيبوها من التيار المموي بمقاولات وي آل ممة لو من تلفات لشة أبوهم لو من نعلة على شرف شريفتهم ما علينا...المهم عندي كهرباء حتى لو بس فولتية بلا أمبير (هو ياهو أحسن)؟ بس عندي سؤال لا تفهموني غلط ومستحي كلش شلون أسأل...ولكن لا حياء في الديمقراطية...إي...والسؤال... إذا جتكم وحدة ضيفة وما عدها بيضات...شلون تستفاد من الكهرباء في المضايف الحكومية.... أقصد تماما تماماً السجون السرية ! لو كهرباء الحكومة للرجال فقط .
| |
|