فيترجي حشاش رد

السلام عليكم منا الراس
الشارع , اليوم جنت دا اسوق سيارتي وفاتح التبريد ,,
سيارتي شادلها مبردة صغيرة و الحلفات تاخذ مي من الراديتر ,, المهم , و
مشغل ام كلثوم كوكتيل ردح لسة فاكر مو طبيعي
,, و أجررررق ما اشوف السيارة الا و اتوفت شوية ,, لا ايد لا رجل لا جكمجة
,, طبكت بنص الشارع والعالم اتصيح عليه ما ادري ليش , مع انه طابك بنص
الشارع مالي علاقة بيهم , و نزلت فتحت الصندوك اباوع ,, السبير بمكانه ,,
الجك جان مكلوب ,,
عدلته و رجعت اشغل ماكو شي ,, طلعت الاوراق مال السيارة من الدشبول و
حطيتها بجيبي ,, كلت خاف مسوية ثكل عال سيارة و مدا تكدر تمشي ,,
هم ماكو فائدة ,, اخر شي كلت خلي افتح البنيد ولو ماله علاقة ,, والله و
اشوف القايش مال الداينمو مكطوع ,, اني ما عبالي هذا قايش مال داينمو ,,
اني عبالي واحد ناسي حزامة جوة البنيد و انكرط ,,
حاولت اشغلها جطل من بايسكل قريب ,, ما فاد ,, كلت ملازم جطل ,, خلي اشغلها
خاشوكة ,, كامت بس ترجع بك لي ورة ,, الى ان رادت اتفوت بكراج مال بيت
عالم ما اعرفهم ,,
كللولي اسحبها و وديها لأبو أوباما الفيتر هسة يسولكياها ,,
والله ما اطولها عليكم ,, جلبت بالسيباية فوك برجليه و جلبت بتاتا فاتت
بذيج اللحظة و سحلتني اني والسيارة ,,
لحد ما وصلت لمكان شفت محل مكتوب
ورشة البيت الابيض لتصليح السيارات بأدارة ابو اوباما الفيتر
- السلام عليكم
- عليكم السلام
- سيارتي ما تشتغل
- ليش ما تشتغل؟
- لان تعيينات ماكو
- سيارتك ما تشتغل ؟؟ مممم لعد منو يصرف عال بيت؟؟
- المبردة
الفيتر راد يفتح البنيد ما عرف يمكن عبالة سيارة موديل 2011 ما ينفتح الا
بباسوورد ,, جيت هفيت البنيد بدفرة انفتح ,,
باوع ,, كلي ابني عندك تروجان بالبولبرن ,, و المحرك لازم يتفرمت
- اي و الكابريتر بي بادسيكتر
- راح اشدلك فيستا حتى تكدر اتبج بيها ,, لان الاكس بي يخليها اتعتعت ,,,
هو هذا حظي ,, اول مرة بحياتي اروح لفيتر ,, يطلع مخبل ,, المهم
عفتة يفرمت مدري شيصخم , و اشتريتلي لفة فلافل ( حمص عراقي كامل الدسم ) و
كعدت انتظر
ورة شوية كلي
- هاي شنو ؟؟؟ لا حول ولا قوة الا بالله
اني جفلت عبالي سيارتي دا اتجيب و اتوفت اثناء الولادة ,, تالي كلت وية
روحي لك مرتضى اكو سيارة اتجيب؟؟ بعدين شتجيب ؟؟ حجلة؟؟ بعدين سيارتي سوبر
يعني ذكر مو انثى
شلون اتجيب؟؟
كتله خير حجي شبيك؟؟
- عندك سرطان بالداينمو ... و راح استأصله حتى لا يضرب عال ليطة مال محرك
,,
كتله اتحب اتبرعلها ببطل دهن بريك شي ؟؟؟ اني فصيلتي H2O
كلي لا ما يحتاج ...
و ظل الوكت كله يكلي ,, هاي البلكات بيها بنجر ,, بنجر بالبلكات ؟؟؟ والله
ولا سامع ,, و الباتري بي أيدز و مي مابي راح اجيبلك سناء بدل مي ,, و هكذا

الى ان صفت سيارتي سكراب ,, حتى الستيرن ما خلص منه
,, كصكص الجوة بقت بس الحلقة مال الستيرن ,, فصلها سواها حزام ..
اخر شي اجة رجال محترم شافني كلي خير شعندك هنا ؟؟
كتلة انتة منو ؟؟
كلي اني ابو اوباما الفيتر ,,
اني ازبهليت و انشدهت ( اكثر من اندهشت بشوية ) و كتله لعد الفيتر اللي
صارلة ساعة أيعذب بسيارتي منو؟؟ بيل كلينتون؟؟
باوع عليه و رأسا ركض عليه و كمشة و دك بسط
طلع ابن خاله اللي جان بالشماعية و طالع بالعفو .. مو المخابيل سوولهم عفو و
طلعوهم و اني حظي ما وكع الا ويا وسوة نفسة فيتر ,, لكيت 3 براغي باقية من
السيارة ,, حطيتهن بجيبي ودكيتها مشي لبيتنا ...
وهسة راحت السيارة ,, و دا افكر اشتري حصان 4 سلندر و عربانة صغيرة و اكتب
لي ورة "لا تلحكني تتعب" و اتوكل على الله و ابيع نفط ,, الى ان اكدر اشتري
سيارة مرة لخ ,,